ਭਾਵਨਾਵਾਂ: ਕੁਲਦੀਪ

ਬੜੀਆਂ ਨਾਜ਼ੁਕ ਨੇ ਮੇਰੇ ਦੇਸ਼ ਦੀਆਂ ਭਾਵਨਾਵਾਂ
ਵਹਿ ਜਾਂਦੀਆਂ ਨੇ ਜੜ੍ਹਵਾਦੀਆਂ ਦੇ ਸੀਵਰੇਜੀ ਵਹਿਣਾਂ 'ਚ
ਕੁਝ ਨਾਜ਼ੁਕ ਹੋ ਜਾਂਦੀਆਂ ਹਨ ਵੋਟਾਂ ਦੇ ਸਾਨ੍ਹ-ਭੇੜ ਤਮਾਸ਼ੇ ਤੋਂ ਪਹਿਲਾਂ
ਖੇਡਿਆ ਜਾਂਦਾ ਹੈ ਇਹਨ੍ਹਾਂ ਦੇ ਰੇਂਗਦੇ ਜਿਸਮ ਤੇ ਕੋਟਲਾ ਛਪਾਕੀ
ਪਚਾ ਦਿੱਤਾ ਜਾਂਦਾ ਹੈ ਬਿਮਾਰ ਮਿਹਦੇ 'ਚ ਲੋਕ ਸਭਾ ਦਾ ਕਚਰਾ
ਉਬਾਲਿਆ ਜਾਂਦਾ ਹੈ ਦੰਗਿਆਂ ਦੇ ਬਾਲਣ ਤੇ ਧਰਮ ਦੇ ਪਤੀਲੇ ਵਿੱਚ ਪਾ ਕੇ
ਬੜਾ ਨੱਚਦੀਆਂ ਨੇ ਰੂੜੀਵਾਦੀਆਂ-ਪਰੰਪਰਾਵਾਦੀਆਂ ਦੇ ਢੋਲ-ਢਮਕਿਆਂ ਉੱਤੇ
ਨਿਚੋੜ ਲਿਆ ਜਾਂਦਾ ਹੈ ਭੁਖੀਆਂ ਨਸਾਂ 'ਚੋਂ ਰੁਖੀਆਂ ਰੋਟੀਆਂ ਦਾ ਲਹੂ
ਵਿਸ਼ਵੀਕਰਨ ਦੇ ਬਾਜ਼ਾਰ 'ਚ ਵੇਚੀ ਜਾਂਦੀ ਹੈ ਇਹਨਾਂ ਦੇ ਜਿਸਮ ਦੀ ਉੱਨ
ਹਰ ਵਾਰੀ ਦਰੜ ਕੇ ਲੰਘ ਜਾਂਦਾ ਹੈ ਲਹੂ ਰੰਗੀਆਂ ਬੱਤੀਆਂ ਦਾ ਕੁਰਲਾਟ।
ਬੜੀਆਂ ਨਾਜ਼ੁਕ ਨੇ ਮੇਰੇ ਦੇਸ਼ ਦੀਆਂ ਭਾਵਨਾਵਾਂ
 
-ਕੁਲਦੀਪ